१५ वर्ष पुरानो रेकर्ड तोड्ने तयारीमा आईफोन १७, इतिहासमै सबैभन्दा लामो समय ‘फ्ल्यागशिप’ रहने पक्का

एप्पलले गत सेप्टेम्बरमा आईफोन १७ सार्वजनिक गरेसँगै कम्पनीको फ्ल्यागशिप आईफोनसम्बन्धी एउटा पुरानो रेकर्ड तोडिने सम्भावना बढेको छ। हालसम्मको बजार चर्चा र उपलब्ध सूचनालाई आधार मान्ने हो भने आईफोन १७ एप्पलको मुख्य फ्ल्यागशिपका रूपमा सबैभन्दा लामो समय टिक्ने आईफोन बन्न सक्ने देखिएको छ।

हालसम्म यो रेकर्ड आईफोन ४को नाममा छ। सन् २०१० जुनमा बिक्री सुरु भएको आईफोन ४ अक्टोबर २०११ सम्म एप्पलको मुख्य फ्ल्यागशिपका रूपमा कायम थियो। यसरी करिब ४७७ दिन अर्थात् १५.७ महिना आईफोन ४ शीर्ष स्थानमा रहेको थियो।

अब आईफोन १७ भने करिब ५५० दिन अर्थात् १८ महिनासम्म एप्पलको मुख्य फ्ल्यागशिप रहने अनुमान गरिएको छ।

आईफोन ४ को रेकर्ड कसरी बन्यो?

आईफोन ४ सन् २०१० जुन २४ मा सार्वजनिक भएको थियो। त्यसबेला एप्पलले नयाँ आईफोन सार्वजनिक गर्ने समयतालिकामा परिवर्तन गरेका कारण यसको फ्ल्यागशिप अवधि अपेक्षाकृत लामो भएको थियो।

ग्राहकहरू नयाँ आईफोनको प्रतीक्षामा रहे पनि एप्पलले आईफोन ५ को सट्टा आईफोन ४एस सार्वजनिक गरेको थियो। बाहिरी डिजाइनमा आईफोन ४ सँग धेरै समान देखिए पनि ४एसमा आन्तरिक रूपमा महत्वपूर्ण सुधार गरिएको थियो।

आईफोन ४एससँगै एप्पलले आफ्नो भर्चुअल असिस्टेन्ट सिरी (Siri) सार्वजनिक गरेको थियो। क्यामेरा तथा कार्यसम्पादनमा समेत सुधार गरिएको थियो।

आईफोन ४ को बजार विस्तार पनि चरणबद्ध रूपमा भएको थियो। अमेरिकामा सुरुमा यो एटी एन्ड टी नेटवर्कमा उपलब्ध थियो भने करिब छ महिनापछि भेरिजोनमार्फत पनि बिक्री सुरु भएको थियो। चर्चित सेतो मोडेल भने विभिन्न प्राविधिक समस्याका कारण करिब १० महिनापछि मात्र बजारमा आएको थियो।

आईफोन १७ ले नयाँ रेकर्ड बनाउने सम्भावना

सन् २०११ यता कुनै पनि आईफोनले आईफोन ४ को १५.७ महिनाको रेकर्ड तोड्न सकेका छैनन्।

यसको सबैभन्दा नजिक आईफोन ११ प्रो पुगेको थियो। सन् २०१९ सेप्टेम्बरमा सार्वजनिक भएको आईफोन ११ प्रो करिब ३९९ दिन अर्थात् १३.१ महिनासम्म एप्पलको शीर्ष फोनका रूपमा रहेको थियो। कोभिड–१९ महामारीका कारण आईफोन १२ को सार्वजनिक समय प्रभावित हुँदा ११ प्रोको फ्ल्यागशिप अवधि केही लामो भएको थियो।

हालको प्रक्षेपणअनुसार आईफोन १८ सन् २०२७ को वसन्तभन्दा अगाडि सार्वजनिक नहुने अनुमान छ। त्यसो भए आईफोन १७ करिब १८ महिनासम्म एप्पलको मुख्य फ्ल्यागशिप रहनेछ।

फ्ल्यागशिप आईफोनहरूको अवधि यसप्रकार छ:

प्रो मोडेलमा भने वार्षिक अपडेट

आईफोन ४ को समय र अहिलेको अवस्थामा महत्वपूर्ण फरक छ। त्यसबेला नयाँ मोडेलको लामो प्रतीक्षाले ग्राहकमा नयाँ फिचरको अभाव सिर्जना गरेको थियो।

यसपटक भने एप्पलले आईफोन १७ देखि आईफोन १८ को अवधिमा प्रो मोडेलहरूलाई नियमित रूपमा अपडेट गर्ने अपेक्षा गरिएको छ। त्यही अवधिमा एप्पलले आफ्नो पहिलो फोल्डिङ आईफोन सार्वजनिक गर्ने चर्चा पनि छ।

फोल्डिङ आईफोन एप्पलको हार्डवेयर इतिहासकै ठूलो परिवर्तनमध्ये एक हुन सक्ने अनुमान गरिएको छ। तर नयाँ प्रविधि र प्रो मोडेलको वार्षिक अपडेटका बाबजुद पनि नियमित फ्ल्यागशिप लाइनअपमा सबैभन्दा लामो समय टिक्ने रेकर्ड भने आईफोन १७ ले बनाउने सम्भावना छ।

सबैभन्दा छोटो समय टिक्ने आईफोन कुन?

एप्पलका फ्ल्यागशिप आईफोनमध्ये सबैभन्दा छोटो अवधि आईफोन एक्स (iPhone X) को रहेको देखिन्छ।

सन् २०१७ सेप्टेम्बरमा घोषणा गरिएको आईफोन एक्स नोभेम्बरमा मात्र बजारमा आएको थियो। त्यसको करिब १० महिना नपुग्दै एप्पलले आईफोन एक्सएस सार्वजनिक गरेर नयाँ पुस्ताको फ्ल्यागशिप अघि बढाएको थियो।

त्यसैले लामो समयसम्म फ्ल्यागशिप रहने सम्भावनाले आईफोन १७ लाई एप्पलको इतिहासमा विशेष स्थान दिलाउने देखिएको छ।