एजेन्सी । अन्तर्राष्ट्रिय आणविक ऊर्जा निकाय (IAEA) ले इरानस्थित बुशेहर परमाणु ऊर्जा केन्द्र नजिक भएका हमलाबारे आफूलाई जानकारी प्राप्त भएको जनाउँदै ‘गम्भीर चिन्ता’ व्यक्त गरेको छ।
निकायका अनुसार आक्रमणपछि हालसम्म रेडियोविकिरणको स्तर बढेको कुनै संकेत नदेखिएको भए पनि परमाणु केन्द्र र वरपरका क्षेत्रमा आक्रमण गर्नु अत्यन्त जोखिमपूर्ण हुने चेतावनी दिइएको छ। IAEA ले सम्भावित परमाणु दुर्घटना रोक्न अधिकतम सैन्य सावधानी अपनाउन सबै पक्षलाई आह्वान गरेको छ।
यसैबीच, अब्बास अराघची ले बुशेहर केन्द्र नजिक भएका भनिएका आक्रमणबारे प्रतिक्रिया दिँदै रेडियोविकिरण चुहावट भए खाडी क्षेत्रमा ठूलो मानवीय संकट निम्तिन सक्ने चेतावनी दिएका छन्।
उनले सामाजिक सञ्जाल एक्समार्फत प्रतिक्रिया दिँदै विगतमा जापोरिज्जिया परमाणु ऊर्जा केन्द्र वरपरको आक्रमणमा पश्चिमा देशहरूले देखाएको आक्रोश स्मरण गराएका छन्। साथै, इजरायल र अमेरिकाले बुशेहर केन्द्रमा पटक–पटक आक्रमण गरेको आरोपसमेत लगाएका छन्, यद्यपि दुवै देशले यसबारे औपचारिक पुष्टि गरेका छैनन्।
अराघचीका अनुसार यदि रेडियोविकिरण चुहावट भयो भने यसको प्रभाव तेहरानमा मात्र सीमित नहुने र खाडी समन्वय परिषद् (GCC) अन्तर्गतका देशहरू—बहराइन, कुवेत, ओमान, कतार, साउदी अरब र संयुक्त अरब इमिरेट्स का राजधानीहरूमा समेत गम्भीर असर पर्न सक्नेछ।
