पाँच रोपनीमा सयपत्री खेती गरेर तनहुँका रेग्मी दम्पतीले कमाए दुई लाख रुपैयाँ

तनहुँको भानु नगरपालिका–२ दाहालटारका सुभाष रेग्मी र उहाँकी श्रीमती अञ्जना अधिकारी रेग्मीले पाँच रोपनी जमिनमा व्यावसायिक सयपत्री फूलखेती गरेर यस वर्ष बिक्रीबाट दुई लाख रुपैयाँ प्राप्त गर्नुभएको छ। यही जमिनमा पहिले मासखेती गर्दा वर्षमा २५ देखि ३० हजार रुपैयाँ मात्रै आम्दानी हुने गरेको थियो।

तिहारलाई लक्षित गरी सुरु गरिएको फूलखेतीबाट यस वर्ष चार लाख रुपैयाँ आम्दानी गर्ने लक्ष्य राखिएको थियो। तर फूल फुल्ने समयमा लगातार वर्षा हुँदा उत्पादन र बिक्री दुवै प्रभावित भएको रेग्मीले बताउनुभएको छ। त्यसका बाबजुद परम्परागत मासखेतीको तुलनामा सयपत्रीबाट बढी आम्दानी भएको उहाँहरूको अनुभव छ।

रेग्मी दम्पतीले फूललाई माला उन्ने काम नगरी प्रतिकिलोका दरले बिक्री गरेका छन्। उनीहरूले प्रतिकिलो ३०० देखि ५०० रुपैयाँसम्ममा फूल बेचेका छन्। यस वर्ष करिब पाँच सय किलो फूल बिक्री भएको र उत्पादित फूलमध्ये झन्डै ९० प्रतिशत काठमाडौं पठाइएको रेग्मीले जानकारी दिनुभएको छ। राजधानीमा सयपत्रीको माग रहेकाले स्थानीय बजारमा मात्रै निर्भर हुनुनपरेको उहाँको भनाइ छ।

भानु नगरपालिकामा जनस्वास्थ्य निरीक्षकका रूपमा कार्यरत रेग्मीले कार्यालयको जिम्मेवारीसँगै बिहान र बेलुकाको समय खेतीमा लगाउँदै आउनुभएको छ। फूल रोप्ने, गोडमेल गर्ने, सिँचाइ, हेरचाह र बिक्री व्यवस्थापनमा उहाँ र श्रीमती दुवै संलग्न हुनुहुन्छ।

सयपत्रीसँगै रेग्मी दम्पतीले छ रोपनी जमिनमा उखुखेती गरेका छन् भने तीन सय वटा कागतीका बिरुवासमेत लगाएका छन्। एउटै बालीमा निर्भर नभई विभिन्न कृषि उत्पादनमार्फत आम्दानीका स्रोत विस्तार गर्ने उनीहरूको योजना छ।

रेग्मीका अनुसार समय र श्रमको सदुपयोग गर्दै बजारको मागसँग मिलाएर खेती गर्न सके स्वदेशमै कृषि व्यवसायबाट आम्दानी बढाउने सम्भावना छ। स्थानीय उत्पादनले भरपर्दो बजार पाउने वातावरण बने फूलखेती पनि किसानका लागि उपयोगी विकल्प बन्न सक्ने उहाँको धारणा छ।