लगातारको वर्षापछि हुम्लाका मुख्य र ग्रामीण सडक अवरुद्ध

लगातारको वर्षापछि आएको बाढी, पहिरो र ढुंगा खस्ने घटनाका कारण हुम्लाका मुख्य तथा ग्रामीण सडकमा यातायात प्रभावित भएको छ। सिमकोट–हिल्सा सडक, कर्णाली करिडोर तथा जिल्लाका सातवटै गाउँपालिकासम्म पुग्ने ग्रामीण सडकका विभिन्न खण्डमा क्षति पुगेको प्रहरीले जनाएको छ।

जिल्ला प्रहरी कार्यालय हुम्लाका प्रहरी नायब उपरीक्षक शंकर खड्काका अनुसार लगातारको वर्षापछि विभिन्न सडकखण्डमा पहिरो र ढुंगा खस्दा आवागमन रोकिएको हो। कर्णाली करिडोरको कावाडी–हिल्सा खण्डका केही स्थानमा ठूला ढुंगा खसेर सडक पूर्ण रूपमा अवरुद्ध भएका छन्। कावाडी–ग्युसी खण्डबाट पहिरो र ढुंगा हटाएर यातायात सञ्चालनमा ल्याइएको भए पनि माथिल्लो खण्ड खुलाउने प्रयास जारी छ।

प्रमुख जिल्ला अधिकारी भोलानाथ गुरागाईंका अनुसार ग्रामीण सडकमा ७० भन्दा बढी स्थानमा पहिरो गएको छ। अवरुद्ध सडक खुलाउन सम्बन्धित स्थानीय तहसँग समन्वय भइरहेको छ। जिल्ला सदरमुकाममा विद्युत् अवरोध रहेकाले क्षतिको पूर्ण विवरण संकलन गर्न पनि कठिनाइ भइरहेको अधिकारीहरूले बताएका छन्।

उत्तरी हुम्लाको नाम्खा गाउँपालिका–५ स्थित नारा पास तथा लिमी जाने न्यालु पास क्षेत्रमा करिब साढे तीन फिटसम्म हिउँ जमेको छ। प्रहरीले हिउँ नहटाएसम्म ती सडक सञ्चालनमा ल्याउन कठिन हुने जनाएको छ। सडक अवरोधका कारण खाद्यान्न तथा दैनिक उपभोग्य वस्तुको ढुवानी, बिरामीको आवतजावत र अत्यावश्यक सेवामा समेत असर परेको छ।