शरद् ऋतुमा ६९ देशका ६४८ आरोहीलाई हिमाल चढ्न अनुमति

काठमाडौं । नेपालको २०२६ को शरद् ऋतुमा २० वटा हिमाल आरोहणका लागि ६९ देशका ६४८ आरोहीले अनुमति लिएका छन्। पर्यटन विभागका अनुसार अनुमति ७१ टोलीका ४८५ पुरुष र १६३ महिला आरोहीलाई दिइएको हो।

विभागका सूचना अधिकारी सुरज घिमिरेका अनुसार अनुमति पाउने आरोहीमा चीनका ११८, रुसका ५७, फ्रान्सका ५१, अमेरिकाका ४१, बेलायतका ३८, जर्मनीका ३४, जापानका २१, नेपालका २० र भारतका १८ आरोही छन्। अन्य विभिन्न देशका आरोहीले पनि अनुमति पाएका छन्।

मनास्लु (८,१६३ मिटर) का लागि सबैभन्दा धेरै आरोहीले अनुमति लिएका छन्। मनास्लु आरोहणका लागि मात्रै ४३ टोलीका ५०० आरोहीलाई अनुमति दिइएको छ र यसबाट रु २२ करोड ५८ लाख ५० हजार रोयल्टी संकलन भएको विभागले जनाएको छ।

त्यसैगरी धौलागिरि–१ का लागि ३४, पुथा हिमचुलीका लागि २०, डाङ्गा हिमचुलीका लागि १६ र बरुन्चे हिमालका लागि १० आरोहीले अनुमति पाएका छन्। मकालु, गंगापूर्ण पश्चिम, थोरङ पिक, नोर्बु खाङ, अन्नपूर्ण–४, चाम्लाङ, लमजुङ हिमाल, पुमोरी, सारिबुङ, थापा पिक, पोखर काङ, अर्दाङ र पेरीलगायत हिमालका लागि पनि अनुमति जारी गरिएको छ।