एजेन्सी । डोनाल्ड ट्रम्प ले इरानसँगको तनाव चर्किएको एक महिनापछि अप्रिल २ मा अमेरिकी जनतालाई सम्बोधन गर्दै १९ मिनेट लामो भाषण दिएका थिए। उक्त सम्बोधनमा उनले अमेरिकाले इरानको हवाई शक्ति पूर्ण रूपमा ध्वस्त पारेको र तेहरानमाथि पूर्ण नियन्त्रण स्थापित गरिसकेको दाबी गरेका थिए।
ट्रम्पले अमेरिकी लडाकु विमानहरू तेहरान माथि उडिरहेको र इरानसँग जवाफ दिने क्षमता नरहेको बताएका थिए।
तर पछिल्ला घटनाक्रमले फरक चित्र देखाएका छन्। पछिल्लो २४ घण्टामा अमेरिकाका दुई सैन्य विमान र उद्धार कार्यमा संलग्न दुई ब्ल्याकहक हेलिकोप्टर इरानी आक्रमणको निशाना बनेका छन्।
समाचार एजेन्सी Associated Press (AP) का अनुसार पछिल्लो २३ वर्षमा पहिलो पटक अमेरिकी लडाकु विमान शत्रुको आक्रमणबाट खसालिएको हो। यसअघि सन् २००३ मा इराक युद्ध का क्रममा यस्तो घटना भएको थियो।
इरानसँगको संघर्षमा हालसम्म ७ अमेरिकी विमान नष्ट भइसकेका छन्। पछिल्लो २४ घण्टामै दुई जेट खसालिएका छन् भने दुई उद्धार हेलिकोप्टरमाथि आक्रमण भएको छ।
इरानी सञ्चारमाध्यमका अनुसार सबैभन्दा पहिले अमेरिकी F-15E Strike Eagle लडाकु विमान इरानको दक्षिण–पश्चिम क्षेत्रमा खसालिएको थियो। त्यसपछि उद्धारका लागि पुगेको A-10 Thunderbolt II माथि पनि आक्रमण गरिएको बताइएको छ। उक्त विमान कुवेतको हवाई क्षेत्रमा पुगेर दुर्घटनाग्रस्त भएको जनाइएको छ, तर चालक सुरक्षित रूपमा बाहिर निस्कन सफल भएका थिए।
CBS News का अनुसार F-15E मा रहेका दुईमध्ये एक चालक दल सदस्यलाई सुरक्षित उद्धार गरिएको छ भने अर्को अझै बेपत्ता छन्। इरानी सरकारी सञ्चारमाध्यमले भने उक्त सदस्य इरानको दक्षिणी क्षेत्रमा अवतरण गरेको हुन सक्ने बताएका छन्।
यसैबीच, उद्धारका लागि पठाइएका दुई ब्ल्याकहक हेलिकोप्टरमाथि पनि आक्रमण भएको भए पनि ती हेलिकोप्टरमा रहेका सबै अमेरिकी सैनिक सुरक्षित रहेको जनाइएको छ।
