मुस्ताङ सडक अवरुद्ध भएपछि पोखरा–जोमसोम हवाई यात्रामा चाप बढ्यो

गण्डकी — बाढीका कारण म्याग्दीको बेनी हुँदै मुस्ताङ जोड्ने सडक अवरुद्ध भएपछि पोखरा–जोमसोम हवाई मार्गमा यात्रुको चाप बढेको छ। सडक यातायात बन्द भएपछि मुस्ताङ आवतजावत गर्ने यात्रु र पर्यटकको भर हवाई सेवामा बढेको हो।

जोमसोम विमानस्थलका प्रमुख विश्वनाथ शर्माका अनुसार सीमित उडानका कारण यात्रुको मागअनुसार सेवा दिन कठिन भइरहेको छ। बिरामी तथा अशक्त यात्रुलाई प्राथमिकता दिइएको छ भने स्थानीय प्रशासन र विमानस्थल कार्यालयले यात्रु व्यवस्थापनमा सहजीकरण गरिरहेका छन्।

पोखरा अन्तर्राष्ट्रिय विमानस्थलका सूचना अधिकारी बिनोद सिंह रावतका अनुसार जोमसोममा दिउँसो तीव्र हावा चल्ने भएकाले अधिकांश उडान बिहानै सञ्चालन गर्नुपर्ने अवस्था छ। यसले माग बढेको समयमा थप उडान व्यवस्थापन गर्न कठिनाइ थपेको छ।