पाल्पामा पहिरोमा परी दुई जनाको मृत्यु, तीन जना बेपत्ता

पाल्पाका विभिन्न स्थानमा आइतबार गएको पहिरोमा परी दुई जनाको मृत्यु भएको छ भने तीन जना बेपत्ता भएका छन्। लगातारको वर्षापछि माथागढी र रिब्दीकोट क्षेत्रमा पहिरो गएको हो।

जिल्ला प्रहरी कार्यालय पाल्पाका अनुसार माथागढी गाउँपालिका–२ रुप्से राजौलीका शेरबहादुर छिडी र रिब्दीकोट गाउँपालिका–६ थिमुरे धुस्टुङकी कृष्णकुमारी सारुको पहिरोमा परी मृत्यु भएको हो। दुवै जनाको शव निकालेर जिल्ला अस्पताल पाल्पामा पोस्टमार्टमका लागि पठाइएको जनाइएको छ।

पहिरोका कारण तीन जना अझै बेपत्ता रहेको प्रहरीले जनाएको छ। बेपत्ताको खोजी तथा घटनाको थप विवरण संकलन भइरहेको छ।

पाल्पामा पछिल्ला दुई दिनदेखि लगातार परेको वर्षाका कारण पहिरो तथा बाढीका घटना भएका छन्।