नारायणी नदीको बाढीले चितवनतर्फ १ हजार १५० मिटर तटबन्धमा क्षति

चितवन, २१ असोज । नारायणी नदीमा आएको बाढीले चितवनतर्फ नदीकिनारमा निर्माण गरिएको करिब १ हजार १५० मिटर तटबन्धमा क्षति पुर्‍याएको छ। भरतपुर महानगरपालिका क्षेत्रमा नारायणी पुलबाट पश्चिमतर्फ गोलाघाटसम्मको ३५ किलोमिटरमध्ये करिब २० किलोमिटर क्षेत्रमा तटबन्ध निर्माण गरिएको छ।

सिँचाइ तथा जलस्रोत आयोजना भरतपुरका सूचना अधिकारी इन्जिनियर सागर पौडेलका अनुसार सिद्धिगणेश वन क्षेत्रमा ६०० मिटर, मझुवा वन क्षेत्रमा ३०० मिटर र हिरापुर क्षेत्रमा १०० मिटर तटबन्ध प्रभावित भएको छ। गौरेश्वर, गाँजीपुर र कटेरो क्षेत्रमा ५०–५० मिटर तटबन्धमा पनि क्षति पुगेको छ।

तटबन्ध निर्माण भएका कारण चितवनतर्फ बाढीको प्रभाव तुलनात्मक रूपमा सीमित रहेको पौडेलले बताउनुभएको छ। केही तटबन्ध निर्माण हुन बाँकी स्थानबाट बाढी बस्तीमा पसे पनि ठूलो क्षति हुन नपाएको जनाइएको छ।

नवलपरासीतर्फ भने तटबन्ध निर्माण कम भएका क्षेत्रमा बाढीले बढी कटान गरेको छ। अमलटारी क्षेत्रमा करिब ३ किलोमिटर तथा नन्दपुर, सीतापुर र सेरी क्षेत्रमा करिब २ किलोमिटर क्षेत्रमा क्षति पुगेको बताइएको छ। अन्य विभिन्न स्थानमा समेत तटबन्ध र नदीकिनार प्रभावित भएका छन्।

नवलपरासी क्षेत्रमा नारायणी पुलबाट तल पर्ने करिब ९८ किलोमिटरमध्ये करिब ९ किलोमिटर क्षेत्रमा मात्रै तटबन्ध निर्माण भएको आयोजना स्रोतले जनाएको छ। तटबन्ध निर्माण नभएका क्षेत्र बाढी र नदी कटानका कारण बढी जोखिममा परेको बताइएको छ।