मोरङको केरौन १३२ केभी सबस्टेसन सञ्चालनमा, विद्युत् आपूर्ति थप भरपर्दो हुने अपेक्षा

मोरङ । मोरङको कानेपोखरी गाउँपालिका–२ मा निर्माण गरिएको १३२ केभी केरौन सबस्टेसन आइतबार, नोभेम्बर १ मा चार्ज गरी सञ्चालनमा ल्याइएको छ। नेपाल विद्युत् प्राधिकरणले सबस्टेसनलाई दुहबी–दमक १३२ केभी प्रसारण लाइनमा लुप–इन तथा लुप–आउट प्रणालीमार्फत जोडेर सञ्चालनमा ल्याएको हो।

सबस्टेसनमा १३२/३३ केभी क्षमताका ६३ एमभीएका दुईवटा पावर ट्रान्सफर्मर र ३३/११ केभी क्षमताको २२.५ एमभीए क्षमताको अर्को ट्रान्सफर्मर जडान गरिएको छ। यसरी यसको कुल जडित क्षमता १४८.५ एमभीए पुगेको छ।

नेपाल विद्युत् प्राधिकरणका कार्यकारी निर्देशक दीर्घायु कुमार श्रेष्ठका अनुसार नयाँ सबस्टेसनले मोरङ र आसपासका क्षेत्रमा बढ्दो विद्युत् माग व्यवस्थापन गर्न तथा वितरण प्रणालीको क्षमता बढाउन सहयोग गर्नेछ। यसबाट उपभोक्ताले थप भरपर्दो र गुणस्तरीय विद्युत् सेवा पाउने अपेक्षा गरिएको छ।

सबस्टेसनबाट रङ्गेली र विराटचोकतर्फ विद्युत् आपूर्तिका लागि ३३ केभीका दुई–दुईवटा लाइन निर्माण गरिएका छन्। ती लाइनलाई तिहारअघि चार्ज गरी सम्बन्धित क्षेत्रमा आपूर्ति सुरु गर्ने तयारी छ। स्थानीय वितरणका लागि पाँचवटा ११ केभी फिडर लाइनसमेत राखिएका छन्, जसलाई पनि छिट्टै सञ्चालनमा ल्याइने जनाइएको छ।

हाल लामो दूरीका ३३ केभी वितरण लाइनबाट विद्युत् पाइरहेका क्षेत्रमा नयाँ सबस्टेसन सञ्चालनपछि आपूर्ति मार्ग छोटिनेछ। त्यसले न्यून भोल्टेज, पटक–पटक लाइन ट्रिपिङ र प्राविधिक चुहावट घटाउन मद्दत गर्ने अपेक्षा प्राधिकरणले गरेको छ। कानेपोखरी, रङ्गेली, विराटचोक, लेटाङ र आसपासका बस्ती यसबाट लाभान्वित हुनेछन्।

आयोजनाको निर्माण सम्झौता २०७८ साल असारमा भएको थियो। करिब एक अर्ब रुपैयाँ लागत अनुमान गरिएको परियोजना नेपाल सरकार र नेपाल विद्युत् प्राधिकरणको लगानी तथा एसियाली विकास बैंकको सहुलियतपूर्ण ऋणबाट निर्माण गरिएको हो।