मातातीर्थ–चोभार १३२ केभी प्रसारण लाइन निर्माण पूरा

काठमाडौं उपत्यकाको विद्युत् आपूर्ति प्रणालीलाई थप सुदृढ बनाउन महत्वपूर्ण मानिएको मातातीर्थ–चोभार १३२ केभी प्रसारण लाइनको निर्माण पूरा भएको छ। नेपाल विद्युत् प्राधिकरणका अनुसार करिब ६ किलोमिटर लामो यो खण्ड शुक्रबारदेखि चार्ज गर्ने तयारी गरिएको छ।

नेपाल विद्युत् प्राधिकरणका अनुसार मातातीर्थ–चोभार खण्ड सञ्चालनमा आएपछि काठमाडौं उपत्यका तथा आसपासको क्षेत्रमा विद्युत् माग र आपूर्तिबीच सन्तुलन कायम गर्न थप सहज हुनेछ। यसले उपत्यकाको विद्युत् प्रणालीमा अर्को वैकल्पिक मार्ग उपलब्ध गराउनेछ।

चोभार सबस्टेसनमा स्थानीय वितरणका लागि ११ केभीका नौ वटा फिडर रहेका छन्। सबस्टेसन सञ्चालनमा आएपछि कीर्तिपुर, फर्पिङ, पुल्चोक र एकान्तकुनालगायत क्षेत्रमा विद्युत् आपूर्ति व्यवस्थापन गर्न सहयोग पुग्ने प्राधिकरणले जनाएको छ।

थानकोट–चापागाउँ–भक्तपुर १३२ केभी प्रसारण लाइन आयोजना काठमाडौं उपत्यकामा प्रसारण प्रणालीको रिङ संरचना विकास गर्ने उद्देश्यले अघि बढाइएको हो। काठमाडौं र भक्तपुरतर्फका अधिकांश संरचना निर्माण सम्पन्न भए पनि ललितपुरतर्फको खण्डमा स्थानीय अवरोधका कारण काम अघि बढ्न सकेको छैन।

चोभारदेखि चक्रपथ हुँदै ललितपुरको लगनखेल (पाटन) सबस्टेसनसम्म करिब ४.५ किलोमिटर भूमिगत १३२ केभी प्रसारण लाइन निर्माणाधीन रहेको र पाटन सबस्टेसनलाई पनि १३२ केभी स्तरमा सञ्चालन गर्ने काम अघि बढाइएको प्राधिकरणले जनाएको छ।