बीपी राजमार्ग पूर्णरुपमा खुल्न अझै दुई दिन लाग्ने

बाढी र पहिरोका कारण अवरुद्ध बनेको बीपी राजमार्ग पूर्णरुपमा सञ्चालनमा आउन अझै दुई दिन लाग्ने भएको छ। सडक डिभिजन कार्यालय भक्तपुरका अनुसार रोशी नदीमा आएको बाढी र लगातारको वर्षाका कारण मर्मत तथा अस्थायी डाइभर्सन निर्माणको काम प्रभावित भएकाले मंगलबार साँझसम्म नियमित यातायात सञ्चालनमा ल्याउने लक्ष्य राखिएको छ।

सडक डिभिजन कार्यालय भक्तपुरका प्रमुख योगेशका अनुसार वर्षा रोकिएपछि सोमबार बिहानदेखि अस्थायी डाइभर्सन निर्माणको काम अघि बढाउने तयारी गरिएको छ। चौकीडाँडामा डाइभर्सन निर्माण सम्भव नभए खानेपानीको पम्प हाउस हटाएर बाटो खुलाउने विकल्पसमेत राखिएको कार्यालयले जनाएको छ।

बाढीले चौकीडाँडामा करिब ३०० मिटर, कटुन्जेमा ३०० मिटर, माम्तीमा १०० मिटर र पिप्लेमा २८५ मिटर सडक बगाएको छ। धुलिखेलदेखि नेपालथोकसम्मको करिब २९ किलोमिटर खण्डमा विभिन्न स्थानमा क्षति पुगेको छ।

यसैबीच, वर्षाका कारण अवरुद्ध धुलिखेल–खावा सडकखण्ड पहिरोको मलबा हटाएपछि सोमबार दिउँसो १ बजेदेखि एकतर्फी सञ्चालनमा आएको छ। कव्रेबञ्ज्याङ–नमोबुद्ध सडकखण्ड भने धुलिखेल नगरपालिका–११ फस्कोटमा सडक भासिएपछि अवरुद्ध रहेको जिल्ला प्रहरी कार्यालय काभ्रेपलाञ्चोकले जनाएको छ।