लन्डनको रिमेम्बरेन्स सन्डेमा नेपालका तर्फबाट दुवाडीले चढाए पुष्पचक्र

लन्डन। बेलायतको ‘रिमेम्बरेन्स सन्डे’ समारोहमा नेपालका तर्फबाट कार्यवाहक राजदूत विपिन दुवाडीले पुष्पचक्र अर्पण गरेका छन्। नोभेम्बर ८ मा लन्डनको ह्वाइटहलस्थित सेनोटाफमा भएको कार्यक्रममा राजा चार्ल्स तृतीयले नेतृत्व गरेका थिए।

युद्धमा ज्यान गुमाएका सैनिकको सम्झनामा आयोजना गरिएको समारोह दुई मिनेट मौनधारणबाट सुरु भएको थियो। बेलायतका राजपरिवारका सदस्य, सरकारी प्रतिनिधि तथा कमनवेल्थ राष्ट्र र आयरल्यान्डका प्रतिनिधिहरू कार्यक्रममा सहभागी थिए। नेपालका तर्फबाट दुवाडीले पनि स्मारकमा पुष्पचक्र चढाएका हुन्।

दुवाडीले वीर गोर्खा सैनिकलगायत देशका लागि बलिदान दिएका सैनिकप्रति श्रद्धाञ्जली अर्पण गर्न पाउनु आफ्ना लागि सम्मानको विषय भएको बताएका छन्। समारोहमा सहभागी भएर उनीहरूको योगदान सम्झन पाएकोमा उनले सम्मान व्यक्त गरेका थिए।

बेलायत सरकारका अनुसार रिमेम्बरेन्स सन्डेमा दुई विश्वयुद्ध तथा त्यसपछिका द्वन्द्वमा संलग्न बेलायती र कमनवेल्थका सैनिक तथा नागरिक सेवाकर्मीको योगदान सम्झिइन्छ। नोभेम्बर ११ मा पर्ने पहिलो विश्वयुद्ध अन्त्यको वार्षिकोत्सव नजिक पर्ने भएकाले यो स्मृति दिवस नोभेम्बरको दोस्रो आइतबार मनाइन्छ।

समारोहपछि रोयल ब्रिटिश लिजनले आयोजना गरेको परेडमा झण्डै १० हजार पूर्वसैनिक सहभागी भएका थिए। परेडमा गोर्खा पूर्वसैनिकसहित विभिन्न सैन्य तथा नागरिक संस्थाका प्रतिनिधि सहभागी भएको प्रतिवेदनमा उल्लेख छ।