घोप्टेभीरको पहिरो हटाइयो, पृथ्वी राजमार्गमा दुईतर्फी यातायात सुचारु

चितवनको इच्छाकामना गाउँपालिका–४ स्थित घोप्टेभीरमा खसेको सुक्खा पहिरो पन्छाएपछि सोमबार दिउँसो १:३० बजेदेखि पृथ्वी राजमार्गमा दुईतर्फी यातायात सञ्चालनमा आएको छ।

नागढुंगा–मुग्लिन सडक आयोजना पश्चिम खण्डका सूचना अधिकारी सचेन्द्र मिश्रका अनुसार पहिरो व्यवस्थापनपछि अवरुद्ध सडक खुलाइएको हो। पहिरो खसेपछि दुवैतर्फ रोकिएका सवारीसाधनलाई सडक खुलेसँगै गन्तव्यतर्फ जान सहज भएको छ।

पहिरो हटाउन मुग्लिन र धादिङ दुवैतर्फबाट लोडर, एक्साभेटर र जेसीबीसहित छ वटा उपकरण परिचालन गरिएको थियो। दिउँसो पहिरो व्यवस्थापनको काम पूरा भएपछि राजमार्गमा आवागमन सामान्य बनेको सम्बन्धित प्रतिवेदनमा उल्लेख छ।

घोप्टेभीरमै अघिल्लो दिन पनि सुक्खा पहिरो खसेर केही समय यातायात प्रभावित भएको थियो। लगातार दोस्रो दिन सोही क्षेत्रमा पहिरो खसेपछि पृथ्वी राजमार्ग भएर यात्रा गर्ने यात्रु तथा मालवाहक सवारीसाधन प्रभावित भएका थिए।