६ बुँदे सहमतिपछि डा. गोविन्द केसीको २५औँ सत्याग्रह अन्त्य

सरकारसँग ६ बुँदे सहमति भएपछि डा. गोविन्द केसीले आफ्नो २५औँ सत्याग्रह अन्त्य गरेका छन्। शिक्षा तथा खेलकुदमन्त्री सस्मित पोखरेल र केसीबीच शुक्रबार रातिदेखि शनिबार बिहानसम्म भएको वार्तापछि सहमति बनेको हो।

सहमति अनुसार प्रा. डा. रमेशप्रसाद आचार्यको संयोजकत्वमा पाँच सदस्यीय समिति गठन हुनेछ। समितिले गेटास्थित शहीद दशरथ चन्द स्वास्थ्य विज्ञान विश्वविद्यालयमा एमबीबीएससहितका शैक्षिक कार्यक्रम सञ्चालन गर्न दिइएको अनुमति र नेपाली सेनाको स्वास्थ्य विज्ञान संस्थानमा थपिएका एमबीबीएस सिटको निर्णय निर्धारित मापदण्डअनुसार भए/नभएको अध्ययन गर्नेछ।

समितिले आफ्नो प्रतिवेदन सरकारलाई बुझाउनेछ। मापदण्ड नपुगेको वा स्वार्थको द्वन्द्व देखिएको पाइए सम्बन्धित निकायका पदाधिकारीमाथि कारबाही हुन सक्ने व्यवस्था पनि सहमतिमा समेटिएको छ।

शहीद दशरथ चन्द स्वास्थ्य विज्ञान विश्वविद्यालय ऐन, २०८२ मा पदाधिकारीको योग्यता र नियुक्तिसम्बन्धी व्यवस्था संशोधन गर्न सरकारले दुई साताभित्र अध्यादेश प्रक्रिया अघि बढाउने सहमति गरेको छ। यसअघि २७ जुलाईमा भएको सहमतिका बाँकी बुँदा कार्यान्वयनको अनुगमन गर्न छुट्टै कार्यदल बनाइनेछ।

सरकारले डडेलधुरा, इलाम र उदयपुरमा सरकारी मेडिकल कलेज वा स्वास्थ्य विज्ञान प्रतिष्ठानका पूर्वाधार विकासलाई तीव्रता दिने र बर्दिबासमा मेडिकल कलेज स्थापना तथा सञ्चालन प्रक्रिया अघि बढाउने प्रतिबद्धता पनि जनाएको छ।