काठमाडौं हरर फिल्म फेस्ट सम्पन्न, ‘केएनएआर’ उत्कृष्ट लघु चलचित्र घोषित

काठमाडौंमा तीन दिनसम्म चलेको काठमाडौं हरर फिल्म फेस्टको दोस्रो संस्करण आइतबार, १ नोभेम्बरमा सम्पन्न भएको छ। दर्शकको मतबाट नेपाली लघु चलचित्र ‘केएनएआर’ उत्कृष्ट लघु चलचित्र घोषित भएको छ। आकाश धिमाल निर्देशित उक्त चलचित्रले प्रतिस्पर्धामा रहेका १८ लघु चलचित्रमध्येबाट पुरस्कार पाएको हो।

महोत्सवको फिचर चलचित्रतर्फ नादिम ताबेत निर्देशित ‘इन दिस डार्कनेस आई सी यू’ उत्कृष्ट घोषित भयो। फ्रान्स, लेबनान, कतार र साउदी अरबको संयुक्त निर्माण रहेको यो चलचित्र ६ प्रतिस्पर्धी फिचर चलचित्रमध्येबाट दर्शक मतका आधारमा छानिएको थियो।

यस संस्करणका लागि २१ देशका २६ चलचित्र चयन भएका थिए। तीमध्ये ८ फिचर र १८ लघु चलचित्र थिए। पाँच नेपाली निर्माण वा सहनिर्माणका चलचित्र पनि छनोटमा परेका थिए।

यसपटक विजेता छनोटमा दर्शकको प्रत्यक्ष सहभागिता थियो। प्रत्येक प्रदर्शनपछि दर्शकले मतपेटिकामा मत खसालेर आफूलाई मन परेको चलचित्र छानेका थिए। आयोजकका अनुसार यस्तो प्रक्रियाबाट दर्शकको रोजाइलाई पुरस्कारमा समेटिएको हो।

महोत्सवको आयोजना नेपाल फिल्म तथा सांस्कृतिक प्रतिष्ठानले गरेको थियो। काठमाडौंस्थित रसियन हाउस स्थल साझेदारका रूपमा रहेको थियो। समापन समारोहमा चलचित्र तथा सांस्कृतिक क्षेत्रका प्रतिनिधि र कूटनीतिक अधिकारीहरू सहभागी भएका थिए।