लन्डन । बेलायतमा बस्दै आएका नेपाली फुटबल खेलाडी साजन डंगोलले फुटबल जगलिङमा दुई विश्व कीर्तिमान कायम गरेका छन्। उनको पछिल्लो उपलब्धि गिनिज वर्ल्ड रेकर्डमा दर्ता भएको छ।
गिनिज वर्ल्ड रेकर्डका अनुसार डंगोलले सन् २०२६ मे १५ मा बेलायतको बर्मिङ्घममा दुवै खुट्टा आलोपालो प्रयोग गर्दै लगातार ६ घण्टा २२ मिनेट ५९ सेकेन्डसम्म फुटबल नियन्त्रणमा राखेर कीर्तिमान बनाएका हुन्। यस क्रममा उनले बललाई जमिनमा खस्न नदिई निरन्तर जगलिङ गरेका थिए।
यसअघि उनले सन् २०२४ फेब्रुअरी १६ मा बर्मिङ्घममै एक घण्टामा २ हजार २१८ पटक फुटबल जगलिङ गरेर अर्को विश्व कीर्तिमान बनाएका थिए। पछिल्लो उपलब्धिसँगै उनको नाम फुटबल जगलिङका दुई फरक कीर्तिमानमा दर्ता भएको छ।
काठमाडौंको टोखामा जन्मिएका डंगोलले सानैदेखि फुटबल खेल्न थालेका थिए। उनले नेपालको अन्डर–१४ राष्ट्रिय लिगबाट आफ्नो फुटबल यात्रा सुरु गरेका थिए। ब्रिगेड ब्वाइज, मनाङ मर्स्याङ्दी, फ्रेन्ड्स क्लब र बाँसबारीलगायतका क्लबबाट उनले विभिन्न प्रतियोगितामा खेलेका थिए। उनी नेपालको अन्डर–१९ राष्ट्रिय टोलीमा पनि छनोट भएका थिए, तर स्वास्थ्य समस्या र चोटका कारण राष्ट्रिय टोलीबाट खेल्न पाएनन्।
बीबीए अध्ययन पूरा गरेपछि उनी सन् २०२१ मा थप अध्ययनका लागि बेलायत गएका थिए। सन् २०२२ मा बर्मिङ्घम सिटी युनिभर्सिटीबाट म्यानेजमेन्ट एन्ड इन्टरनेसनल बिजनेसमा स्नातकोत्तर गरेका डंगोलले बेलायतमा पनि फुटबललाई निरन्तरता दिएका छन्।
फुटबलसँगै उनले पर्वतारोहणमा पनि रुचि राखेका छन्। सन् २०२५ अप्रिल १९ मा ६ हजार ११९ मिटर अग्लो लोबुचे हिमाल आरोहण गरेका उनले सोही वर्ष मे १४ मा सगरमाथाको चुचुरोमा पुगेका थिए।
नोभेम्बर १ मा बर्मिङ्घममा आयोजित कार्यक्रममा डंगोलले आफ्नो फुटबल यात्रा, संघर्ष र विश्व कीर्तिमानबारे अनुभव साझा गरेका थिए। उनले आफ्नो उपलब्धिको प्रेरणा परिवारबाट पाएको र निरन्तर अभ्यास तथा आत्मविश्वासले लक्ष्य हासिल गर्न सहयोग गरेको बताएका छन्।
- साजन डंगोलका फुटबल जगलिङमा दुई विश्व कीर्तिमान दर्ता भएका छन्।
- पछिल्लो कीर्तिमान: लगातार ६ घण्टा २२ मिनेट ५९ सेकेन्ड फुटबल नियन्त्रण।
- उनले सन् २०२५ मा सगरमाथाको सफल आरोहणसमेत गरेका थिए।
💬 पाठक टिप्पणी (Comments) 0
गुगल, फेसबुक वा मेरोसाथ खाता मार्फत सजिलै जोडिनुहोस्।