डोल्पामा हिमपातमा फसेका ६ भारतीय पर्यटकको हेलिकोप्टरबाट सुरक्षित उद्धार

डोल्पाको शे–फोक्सुण्डो गाउँपालिका–८ को डानिगाड क्षेत्रमा भारी हिमपातका कारण अलपत्र परेका छ जना भारतीय पर्यटकलाई सोमबार बिहान हेलिकोप्टरमार्फत सुरक्षित उद्धार गरी दुनै पुर्‍याइएको छ। डोल्पा जिल्ला प्रशासन कार्यालयले सबै पर्यटकको अवस्था सामान्य रहेको जनाएको छ।

डोल्पा प्रहरीका अनुसार उद्धारका लागि निजी हेलिकोप्टर प्रयोग गरिएको थियो। बिहान करिब ६:३० बजे उडेको हेलिकोप्टरले पहिलो उडानमा दुई महिला पर्यटकलाई दुनै पुर्‍याएको र त्यसपछि पुनः घटनास्थल पुगेर बाँकी चार पुरुषलाई उद्धार गरेको थियो।

उनीहरू शे–फोक्सुण्डो ताल भ्रमणपछि माथिल्लो डोल्पातर्फ जाँदै गर्दा भारी हिमपातले पदमार्ग अवरुद्ध भएपछि डानिगाड क्षेत्रमा रोकिएका थिए। उच्च हिमाली क्षेत्रमा लगातार परेको हिउँका कारण उनीहरूको यात्रा अघि बढ्न सकेको थिएन।

आइतबार नेपाली सेनाको हेलिकोप्टर उद्धारका लागि त्यस क्षेत्रमा पुगे पनि खराब मौसमका कारण अवतरण गर्न नसकेपछि प्रयास रोकिएको थियो। सोमबार निजी हेलिकोप्टरबाट उद्धार सम्भव भएको हो।

उद्धार गरिएका पर्यटकलाई दुनैस्थित सरकारी अस्पतालमा उपचारका लागि लगिएको छ। डोल्पा प्रहरीका प्रवक्तासमेत रहेका प्रहरी निरीक्षक बिनय सिंहका अनुसार उनीहरूको अवस्था खतरामुक्त छ।