जीवन सुनुवार निर्देशित ‘भकुण्डे भूत’ काठमाडौं फिल्म फेस्टिभलको सर्ट भिडियो च्यालेञ्जमा प्रथम

काठमाडौँ महानगरपालिकाले आयोजना गरेको काठमाडौं फिल्म फेस्टिभलअन्तर्गत ‘माइ कल्चर, माइ हेरिटेज’ सर्ट भिडियो च्यालेञ्जमा जीवन सुनुवार निर्देशित ‘भकुण्डे भूत’ पहिलो भएको छ। ४ मिनेट ५५ सेकेन्ड लामो उक्त भिडियो प्रतियोगितामा प्राप्त ३५ प्रविष्टिमध्ये निर्णायक मण्डलले उत्कृष्ट छनोट गरेको हो।

राष्ट्रिय सभा गृहमा आइतबार भएको पुरस्कार वितरण समारोहमा पहिलो स्थान हासिल गरेको ‘भकुण्डे भूत’ले १ लाख ५० हजार रुपैयाँ पुरस्कार पायो। अनुभव श्रेष्ठ निर्देशित ‘द सोल अफ गुठी’ दोस्रो हुँदै १ लाख रुपैयाँ र सौगात सापकोटा निर्देशित ‘झीँगु छेँ (मेरो घर)’ तेस्रो हुँदै ५० हजार रुपैयाँ पुरस्कार प्राप्त गरे।

काठमाडौं महानगरपालिकाका कार्यवाहक प्रमुख सुनिता डंगोल, अभिनेता विजय बराल र अभिनेत्री सुरक्षा पन्तले विजेतालाई प्रमाणपत्र, पुरस्कार तथा अवार्ड प्रदान गरेका थिए। प्रतियोगिता ‘माइ कल्चर, माइ हेरिटेज’ विषयमा आयोजना गरिएको थियो।

महानगरपालिकाको विवरणअनुसार फेस्टिभलको नेपाल पानोरामा खण्डमा छनोट भएका नौवटा लघु चलचित्रलाई पनि जनही १ लाख रुपैयाँ प्रोत्साहन पुरस्कार प्रदान गरिएको छ।