मौसम प्रतिकूल बनेपछि मनाङ पुगेका २४६ विदेशी पर्यटक लमजुङ फर्किए

लमजुङ । अन्नपूर्ण चक्रीय पदमार्ग हुँदै मनाङ पुगेका विदेशी पर्यटक निरन्तर वर्षा र प्रतिकूल मौसमका कारण यात्रा छोट्याएर लमजुङतर्फ फर्किन थालेका छन्। थोराङ्ला भञ्ज्याङ पार गर्दै मुस्ताङ, पोखरा लगायतका गन्तव्यतर्फ जाने योजनामा रहेका पर्यटकले पदमार्गमा जोखिम बढेपछि मनाङबाटै फर्किने निर्णय गरेका हुन्।

अन्नपूर्ण संरक्षण क्षेत्र आयोजना (एक्याप) धारापानीका इन्चार्ज भूपेन्द्र गुरुङका अनुसार पछिल्लो एक सातामा फर्किएका २४६ पर्यटकमध्ये १५१ पुरुष र ९५ महिला छन्। केही दिनअघिसम्म धारापानी हुँदै दैनिक १०० देखि १५० विदेशी पर्यटक मनाङतर्फ जाने गरे पनि अहिले पर्यटकको आवागमन उल्लेख्य रूपमा घटेको छ।

थोराङ्ला भञ्ज्याङ हुँदै मुस्ताङलगायत गन्तव्यतर्फ जाने योजनामा रहेका पर्यटकले मौसमको अवस्था र पदमार्गमा बढेको जोखिमलाई ध्यानमा राख्दै बीचबाटै यात्रा छोट्याएका हुन्। अन्नपूर्ण चक्रीय पदमार्ग लमजुङको बेँसीसहरबाट सुरु भएर मनाङ, मुस्ताङ, म्याग्दी र कास्की हुँदै जाने प्रमुख पदयात्रा मार्ग हो। यसको उच्चतम बिन्दु ५ हजार ४१६ मिटर उचाइको थोराङ्ला भञ्ज्याङ हो।