डिजिटल संसदमार्फत सांसदको हाजिरी अब अनलाइन हेर्न सकिने

संघीय संसदको नयाँ डिजिटल पोर्टलमार्फत अब सांसदहरूको उपस्थिति विवरण सर्वसाधारणले अनलाइन हेर्न सक्ने भएका छन्। पोर्टलमा सांसदको प्रोफाइलसँगै संसद् तथा समितिका बैठकमा उनीहरूको उपस्थितिको विवरण सार्वजनिक गरिएको छ।

संघीय संसद्को डिजिटल पोर्टलमा सांसदको नाम, दल, निर्वाचन क्षेत्र तथा संसदीय समितिसँगै बैठकमा उपस्थितिको विवरण राखिएको छ। नागरिकले सांसदको प्रोफाइल खोलेर उनको सदन तथा समिति बैठकको उपस्थिति हेर्न सक्ने व्यवस्था गरिएको छ।

पोर्टलका अनुसार संघीय संसद्मा प्रतिनिधि सभाका २७५ र राष्ट्रिय सभाका ५७ सक्रिय सांसदको विवरण उपलब्ध छ। केही सांसदका प्रोफाइलमा सदन तथा समिति बैठकमा उपस्थित भएको संख्या र प्रतिशतसमेत देखाइएको छ।

संघीय संसद् सचिवालयले डिजिटल प्रणालीलाई संसदीय गतिविधिलाई व्यवस्थित र सार्वजनिक पहुँचमा ल्याउने माध्यमका रूपमा अघि बढाएको छ। प्रणालीमा संसद् बैठकका कार्यसूची, बैठक विवरण, समिति गतिविधि तथा विधायी सामग्रीसमेत हेर्न सकिने व्यवस्था छ।

डिजिटल संसद्को सार्वजनिक पोर्टल हाल परीक्षण तथा विस्तारको चरणमा रहेको भए पनि सांसदको उपस्थिति र संसदीय गतिविधिसम्बन्धी विवरण नागरिकले प्रत्यक्ष हेर्न सक्ने सुविधा उपलब्ध भएको छ।