शरद् ऋतुमा ३१ हिमाल आरोहणका लागि ७८८ आरोहीलाई अनुमति

काठमाडौं — सन् २०२६ को शरद् ऋतुमा नेपालका ३१ हिमाल आरोहणका लागि ७० देशका ७८८ आरोहीले अनुमति लिएका छन्। पर्यटन विभागका अनुसार उनीहरू ९१ वटा आरोहण टोलीमा आबद्ध छन्।

पर्यटन विभागका सूचना अधिकारी सुरज घिमिरेका अनुसार आरोहण अनुमतिबाट विभागले २४ करोड ७२ लाख ७ हजार ६०१ रुपैयाँ रोयल्टी संकलन गरेको छ। कुल अनुमति लिनेमा ५८२ पुरुष र २०६ महिला रहेका छन्।

यस सिजन मनास्लु ८,१६३ मिटर आरोहणका लागि सबैभन्दा धेरै आकर्षण देखिएको छ। मनास्लुका लागि ४३ टोलीका ५०० जनाले अनुमति लिएका छन्। त्यसबाट मात्रै २२ करोड ५८ लाख ५७ हजार १८९ रुपैयाँ रोयल्टी संकलन भएको विभागले जनाएको छ।

धौलागिरि–१ का लागि पाँच टोलीका ३६ जना, हिम्लुङ हिमालका लागि तीन टोलीका ३४ जना र आमादब्लमका लागि दुई टोलीका १९ जनाले अनुमति लिएका छन्। अन्य अनुमतिप्राप्त हिमालमा मकालु, बरुण्त्से, पुमोरी, अन्नपूर्ण–४, चाम्लाङ र लमजुङ हिमाललगायत छन्।

आरोहीको देशगत विवरणमा चीन ११८ जनासहित पहिलो स्थानमा छ। त्यसपछि रूस, फ्रान्स, अमेरिका, बेलायत, पोल्याण्ड, नेपाल, भारत, इटली र जापानलगायतका देशका आरोही छन्।