काठमाडौं फिल्म फेस्टिभलमा शबाना आज्मीले सिनेमामा महिलाको प्रतिनिधित्वबारे चर्चा गरिन्

काठमाडौं, अक्टोबर ३१ । काठमाडौं फिल्म फेस्टिभलअन्तर्गत शनिबार नेपाल पर्यटन बोर्डमा भएको संवादमा भारतीय अभिनेत्री शबाना आज्मीले नेपाली अभिनेत्री स्वस्तिमा खड्कासँग आफ्नो अभिनय यात्रा, सिनेमामा महिलाको प्रतिनिधित्व र कलाकारको सामाजिक जिम्मेवारीबारे विचार आदानप्रदान गरिन्।

कुराकानीमा आज्मीले बाल्यकालदेखि अभिनय क्षेत्रमा प्रवेश गरेको यात्रा र व्यावसायिक तथा कलात्मक सिनेमामा काम गर्दाका अनुभव सुनाइन्। कलाकारका लागि कुन माध्यममा काम गरिन्छ भन्नेभन्दा कथाको गुणस्तर र त्यसलाई इमानदारीपूर्वक प्रस्तुत गर्नु महत्त्वपूर्ण हुने उनको धारणा थियो।

आज्मीका अनुसार व्यावसायिक सिनेमाले उनलाई आर्थिक रूपमा सुरक्षित बनायो भने कलात्मक सिनेमाले आत्मिक सन्तुष्टि दियो। सिनेमामा महिलालाई कमजोर वा पुरुषको छायामा राख्ने पुरानो प्रस्तुति क्रमशः बदलिँदै गएको उल्लेख गर्दै उनले समाजलाई प्रश्न गर्न प्रेरित गर्ने कथा सुनाउन कलाकारको भूमिका महत्त्वपूर्ण हुने बताइन्।

संवादमा खड्काले पनि आफ्नो अभिनय यात्राबारे कुरा राखिन्। मुख्यधारका चलचित्रसँगै फरक शैलीका कथामा काम गर्दै आएको उनको अनुभवले नेपाली र भारतीय सिनेमाबीचका पुस्तागत तथा सिर्जनात्मक भिन्नताबारे छलफललाई थप फराकिलो बनाएको थियो।

काठमाडौं महानगरपालिकाले आयोजना गरेको पहिलो काठमाडौं फिल्म फेस्टिभल अक्टोबर ३० देखि नोभेम्बर १ सम्म सञ्चालन भइरहेको छ। महोत्सवमा नेपाली तथा अन्तर्राष्ट्रिय चलचित्र प्रदर्शनसँगै पुनर्स्थापित नेपाली चलचित्र, छोटा चलचित्र, संवाद र मास्टरक्लास समावेश छन्।

महोत्सवको अन्तिम दिन आइतबार नेपाल पर्यटन बोर्डमा दिउँसो १:३० बजे मार्को मुलरको फिल्म सौन्दर्यशास्त्रसम्बन्धी मास्टरक्लास र दिउँसो ३ बजे नेपाली फिल्म उद्योगको विगत, वर्तमान र भविष्यबारे प्यानल छलफल राखिएको आधिकारिक कार्यक्रम तालिकामा उल्लेख छ।