नेपालले एसीसी मेन्स प्रिमियर कप २०२६ को फाइनलमा संयुक्त अरब इमिरेट्स (यूएई) लाई ४४ रनले पराजित गर्दै उपाधि जितेको छ।
क्वालालम्पुरस्थित बायुमास ओभलमा टस जितेर पहिले ब्याटिङ गरेको नेपालले निर्धारित ५० ओभरमा ९ विकेट गुमाएर ३१३ रन बनायो। नेपालका लागि आशिफ शेखले उत्कृष्ट शतकीय इनिङ्स खेल्दै १०६ बलमा १०२ रन बनाए। उनले ८ चौका र ४ छक्का प्रहार गरे। अर्जुन कुमालले ६३ बलमा ४३ रन जोडे।
३१४ रनको लक्ष्य पछ्याएको यूएई ४९.१ ओभरमा २६९ रनमा अलआउट भयो। यूएईका राहुल चोपडाले १०५ बलमा १०० रन बनाए पनि टोलीलाई जित दिलाउन सकेनन्।
नेपालका लागि करण केसीले ९ ओभरमा ४९ रन दिएर ३ विकेट लिए भने दीपेन्द्रसिंह ऐरीले २ विकेट लिए।
यो जितसँगै नेपालले एसीसी मेन्स प्रिमियर कप २०२६ को उपाधि जितेको हो। आशिफ शेख खेलको प्लेयर अफ द म्याच घोषित भए।
स्रोत: Cricbuzz