‘बाटुलो जून’को टिजर सार्वजनिक, कात्तिक २६ मा प्रदर्शन हुने

अभिनेता अनमोल केसी र प्रिन्सी खतिवडा अभिनित चलचित्र ‘बाटुलो जून’को टिजर सार्वजनिक भएको छ। भुवन केसी निर्देशित चलचित्रको टिजरले २०३० को दशकको नेपाली समाज, जीवनशैली र प्रेमकथाको परिवेश झल्काएको छ।

सार्वजनिक टिजरले चलचित्रको कथालाई पूर्ण रूपमा खुलासा नगरी पात्र, परिवेश र सम्बन्धका केही झलक प्रस्तुत गरेको छ। निर्माण पक्षका अनुसार चलचित्रले अहिलेको प्रविधिमैत्री समयभन्दा फरक पुरानो नेपाली समाजको प्रेम, जीवनशैली र सामाजिक परिवेशलाई कथाको आधार बनाएको छ।

चलचित्रमा अनमोल केसी मुख्य भूमिकामा छन् भने भुवन केसीको पनि महत्वपूर्ण भूमिका छ। प्रिन्सी खतिवडा यही चलचित्रबाट अभिनयमा प्रवेश गरेकी हुन्। बेल्जियममा बसोबास गर्दै आएकी अभिनेत्री गरिमा पन्त पनि चलचित्रमार्फत नेपाली सिनेमामा पुनरागमन गरेकी छन्।

‘बाटुलो जून’को निर्देशन भुवन केसीले गरेका हुन्। सामीप्यराज तिमल्सेना र सरिन पोखरेलले पटकथा लेखेका चलचित्रमा राजेश श्रेष्ठको छायांकन, कृष्ण भण्डारीको सम्पादन र रोमन बज्राचार्यको पार्श्व संगीत रहेको छ। जिया केसी र भविष्य खड्का निर्माता तथा विवेक थापा सह-निर्माता रहेका छन्।